Gabe Mardalan Pat…. ( Taonton…!)

Di acara ni arisan ni halak batak, antar somal do dipamasa arisan “parkartuon” dung sidung acara arisan. Molo songon di kota besar di Jakarta on didokma on songon daon lalap manang refreshing siganup bulan.

Di sada ari, borhatma A.Sarles dohot A. ni Boronson tu acara arisan na dipatupa sahali sabulan di keluarga ni hula-hulana. Dang dohot Nai Sarles dohot Nai Boronson tu arisan i, Alana topet di sadari i adong acara “mamoholi” di punguan parsahutaon di luat nasida.
Na marpariban do A.Sarles dohot A.ni Boronson, jala bagas nasida pe pajonok-jonok do.

Dung sidung acara arisan, dimulai ma acara parkartuon. Ala torop do na naeng markatu i, dibagi ma gabe dua kelompok. Pulik be do kelompok nasida padua. Saleleng na markartu on, talu ma A.Sarles. Ganup tongkin holan na mambukka dompetna. Gorna pe parkartuon, somal ni na talu do panakkokhon “taru”. “Atik boha tahe muba nasib niba gabe monang, asa haru gumodang tarikon annon”, ninna roha ni A. Sarles.
“Ndada simanuk-manuk sibontar andora, ndada sitodo turpuk, siahut lomo ni roha” hape ianggo parkartuon on. Molo naung arina ingkon monang, ba monang ma, suang songoni ma sebalikna.
Lam leleng nasida na markartu i, tong dang adong perubahan, lam tamba godang ma hataluan ni A.Sarles, isi ni dompetna pe nunga lam martipis.
Dihataluonna i, pos rohana adong dope haraphononna A.ni Boronson na lao manggarar ongkosna mulak.

Suang songoni do tong A.ni Boronson. Denggan do nian kartuna, alai dumengganan dope kartu ni donganna sian kartuna i.
Jadi dung lam bagas borngin, songon na tamba denggan ma kartu ni A.ni Boronson. Disi dibukka ibana kartu i, pintor adong ma dua bento dohot dua joker. “Anggo on pe, mangallangi nama au, sahali hudabuhon annon kartukkon pintor mulak nama hataluanki”, ninna roha ni A.ni Boronson huhut songon na hitir-hitir tanganna maniop kartuna na denggan i. Hape ala ni asikna mamereng bento dohot joker na i, gabe dang diparrohahon be songon dia pardalan ni kartu ni donganna, gabe parjolo ma donganna i “leng” Gabe tarbakkar ma bento dohot joker na i. Hona denda ma ibana, jala panggararanna pe nunga gabe umbalga. Sai manolsoli ma ibana “ Aut sugari hupaturun hape bentokkon nakkaning nunga dapot hepeng au sekian-sekian”, ninna rohana. Habis ma hepengna, dang adong be ongkos mulak. Alai tong do songon roha ni A.Sarles roha ni A.ni Boronson, harap rohana asa A.Sarles manggarar ongkos nasida mulak.

Dung sidung parkatuon i, jumpang ma tingkina mulak. Ala naung bagas borngin dang adong be angkutan umum. Marsangkap ma nasida padua naeng martaksi. Di na paima taksi i nasida, didok A.Sarles ma tu A.ni Boronson, “Ho ma jo manggarar taksitta annon da, alana nunga habis hepenghu, ai talu do au nakkaning” ninna A. Sarles. “Bah boha nama i? Ai au pe talu do, bereng ma dompethon, dang adong be isina”, ninna A.ni Boronson huhut dibuka laos dipatudu dompetna i tu A. Sarles. “Antong boha nama hita mulak?” ninna A.Sarles. “Mardalan pat ma hita, nunga nasibta ingkon talu hita padua, boha bahenon….. beta ma…! ninna A.ni Boronson. Dungi mulak ma nasida “Mardalan Pat“ di tonga borngin i…. (TAONTOONNNN…..!!!)

Iklan

12 Tanggapan so far »

  1. 1

    Mr Bin said,

    Pas cerita munaon ito … songonon ma akka amai… sahat di jabu pura pura muruk ma tu inanta asa unang parjolo di muruki… molo di Batam Marsong ma didokkon molo di Jakartaon Marleng… Alai nuaeng on dang be boi songoni di Batam Habis di Rajia Polisi… jadi Judi telah di berangus kecuali melekmelekan surat ijin harus diambil dari polisi

    Desy: Toho ma tutu i…. tuani ma di razia….
    Btw, di Batam adong do hahadolikku/br Silalahi, nasida tinggal di Baloi , atik boha di tanda ito.

  2. 2

    goklas sinurat said,

    ah Uttung ma naek si Pak sutanto gabe Kapolri unag hona songon ceritai au dung mangoli annon.
    alai memeng tung nataboan do namarjuji on ate????????
    nang pe monang Tetap do talu…..haru 2 halak do inna marjuji di tonga laut tong do talu 2ssa inna……
    mauliate ma di cerita mu nai inang?????

    Desy: Bah, nga gabe tarboto na hea ho marjuji…. sotung dibereng halletmu komentarmon, gabe tata annon rohana…hehehe..

  3. 3

    Eston Hasian said,

    Hehehe…gabe mengkel sandiri au, songon na pas “pardalanni kartumon” ito? Gabe curiga ahu 😀

    Desy: Curiga aha do maksudmu ito…? Ai so huantusi songon dia na mar leng on. Ide cerita on sian laemu do, kejadian ni donganna do on… wakakakkk…

  4. 4

    Syalom ito,
    Sepertinya sering menyaksikan orang main kartu ya ito? 🙂

    Desy: Justru karena aku gak ngerti main kartu, makanya aku malas ikut ke arisan ito. Terkadang aku bengong aja ngeliatin yg main kartu, trus disuru pula manjurtuli, manalah aku tau…!

  5. 5

    GOKKON DOHOT JOU2 tu A.Sharles dohot A.ni Boronson

    Ro ma hamu nadua,Bulan na ro. Adong par-leng-on di jabu nami.
    Godang boan hepeng mu na. Unang lupa, boan akka peralatan pramuka.
    Alana molo talu hamu nadua, ikkon mandakit gunung Kerinci hamu molo mulak tu Jakarta.

    Jadi di paboa hami ma parjolo to nai Sharles dohot nai bronson :
    molo tung talo aka ama i, di esemes hami pe anon. Asa di parade hamu akka poti dohot kuburan, alana, timbo do gunung Kerinci (3805m dpl).
    Atik boa…… Marmatean be halaki nadua mandakit i….!

    Songoni ma boa2 sian hami.

    Horas jala gabe

    Desy: Bah, ai naung sorang do huroha pahompu i…? Naeng melek2 an do maksudmu? Hahhaa… anggo anakku si Toni on ma bah, nunga mekkel be annon udam manjaha on di kantorna… anggo ho pe….!

  6. 6

    Hiras T.H Purba said,

    Ai na tarsubang do haroa nasida nadua, na dohot do huroa inangbaona mar-kartu alana di punguan ni hula-hulana do nasida mar-kartu. Ala ni i do i, na tarsubang ma nasida gabe talu ma tutu sampe korois dang adong be ongkos mulak.
    Alai molo di punguan nami di Surabaya dang arisan be dibahen hami goarna, gabe partangiangan bulanan nama berupa kebaktian sekalian arisan, jadi dang adong be masa parjujion disi.
    Alai “campak-campak kata” pariban, ngeri-ngeri do gambar ni pengunjung ni blogmuna on.
    Lae si Eston pe gabe songon kapiting huida (he..he…he), manang na simalolonghu do naung rambun on nuaeng? Patangkas hamu jolo. 🙂

    Desy: Ido ra, mungkin A. ni Boronson segan pamasukkon, ala dang tahan dope inang bao na… hape gabe talu, hahha *gait na i ate..!*
    Bah, sek ganteng ito si Eston i, di dok songon kepiting… boha ma i ito Eston?? Ambal2 kata, pariban jgn lupa hari Minggu tgl 22 Febr 2009 jam 12 siang, si Raynhard tampil di acara “Planet Remaja” AN TV. Gabe juara 2 singkolana, ala dang diboto si Raynhard mangalusi “piga do pat ni kepiting” hahhahah…..

  7. 7

    nababanhitetano said,

    Anggo abang bapa ni si Reinhard dang parjuji kan pariban?, sotung do napengalaman ni ibana? antar didok donganna? 🙂 alai ima tutu angka hami ama2 on ate? ai olo do angka hami ama on sipata mandok, “dang boi modom molo so dibereng bento i ninna”, alai tahe pariban dang holan tudosan ama ina pe nuaeng on tongdo diula, ai gabe olo sipata tarsubang angka namarbao

    Desy: Molo bp si rainhard do… tergantung situasi ma, molo songon na burju do di bereng “borde” i, ba main, alai molo songon na.. na.. na…, na aha do…? hehheh

  8. 8

    Maulina br sirait said,

    Kak’ alani kartui do deba asa semangat angka Ama i lao arisan ate …???

    Desy: Toho mai, sipata las do roha ni ama i molo so dohot inanta i arisan, asa bebas ibana antong, dang adong polisi toba..:D

  9. 9

    Bah… Mauffsss…. gabe tarboto sue cekkian… he.. he… he….
    Alai songonn na pas hian keterangan ni Ito on… sai hera pengalaman pribadi… he..he..he…

    Desy: Nunga marulak2 hudok, dang pengalaman pribadi i, ba gari mar jabolok dohot mar kiu-kiu pe so niantusan:D Ajari jo au ba Kael….

  10. 10

    Mr Bin said,

    Dang hutanda ito br Silalahi nanidokmuna i, alana huta Baloi Bidanghian do alai hulului pe ate….. pos roham ito da?????

    Desy: Haha doliku Pasaribu karejo di kehutanan, angkang borukki br Silalahi di depnaker

  11. 11

    hahaha.. sekkel nai cerita on.. ale tong do godang makna na..
    Mauliate ma ito ..boi hamu manurat si songon on..

    Desy: Molo sekkel di hilala ito, berarti adong pengalaman pribadi ate.. hehehe
    mauliate atas kunjungan muna ito..

  12. 12

    Timbul Sitanggang said,

    Dago kate nai halahi nadua ate. Yakkin ahu nyata do sarita on, cuma bumbunya beda, suang songoni scene na. Na menarik di ahu, penutur sarita on…, sian hata dohot gaya …tong do ra malo markartu. Molo ahu holan mar jokker karo do huboto, dung ro leng… dang lakku be Jokker karo… gabe lak sohea be hujama kartu nungnga pala 20 taon. Didok dongan dang gaol, lop ma disi….

    Desy: hahaha… fiksi do cerita on amang boru… dang dia dalan ni dahh… na mamboto markartu ido naso gaul..


Comment RSS · TrackBack URI

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: